Star Trek tlhIngan toQDuj tI'meH paq ngevchoH

Qo'noSDaq “StarTrek”™ (Hov leng) tlhIngan toQDuj tI'meH paq ngevchoH “Haynes”'e'

veSDujvetlh peghmey 'ang paq'e'. qaStaHvIS tera' jar wa'maH wa', DIvI' Hol chovnatlh lulIngmoHlu' 'ej ngugh luje'laH DIvI' nganpu'. 'ach juHqo'chajDaq tlhIngan Hol chovnatlh luje'laH je Qo'noS nganpu' DaH net maq. tI'meH paqmey'e' lumughlu'pu'bogh tlhIngan Hol lo'lu'taHvIS, Qo'noSDaq wa'DIch 'oH.

tera'Daq Hol'e' lujatlhqu' wa'maH cha' nuvpu' net noH. 'ach qaStaHvIS tera' DIS 1985, “The Klingon Dictionary” (tlhIngan Hol mu'ghom) qonlu'ta', 'ej DaH Hol pab'e', Hol chut'e', Hol mu'tay''e' je loQ Sov cha''uy' vaghbIp DIvI' nganpu' net noH. wIlyam SeQpIr lutmey, “Bible” je mughlu'meH Holvam qu' lo'lu'ta'.

jatlh tlhIngan Qang'a' Martaq:

«Hem tlhIngan Segh 'ej maquvqu' je. veSDujvam tI'meH paq lIngbe'pu'mo' “Haynes,” nughmaj tIchqu'lu'bej jay'. 'ach Do' tlhIngan yejquv qepDaq yInraj luchoqlu'ta' 'e' wIwuq. ghowuqHa'moHQo'.»

jatlh “Jeremy Yates-Round,” “Haynes Publishing” vu'bogh ra'wI':

«tlhIngan toQDuj tI'meH paq tlhIngan Hol chovnatlh wIlIngta'mo' maQuchqu' maH. yuQmaj Sanglu' 'e' wIbotmeH 'ut wanI'vam 'e' wIHar.»

paqvam nung “U.S.S. Enterprise Manual”'e' (U.S.S. 'entepray' tI'meH paq'e'); qaStaHvIS tera' DIS 2010 lInglu'ta' 'oH, 'ej Qapla' Doj chav.

“Destination Star Trek (ghoch Hov leng) London”Daq paq luleghlaH Hoch nuvpu', Hoch Dep, Hoch HoSDo' je; "Excel"Daq tera' jar wa'maH, jaj 19-21DIch qaStaH wanI' (latlh De' Suqlu'meH, www.startreklondon.com yISuch).